7alaal-el-mashakel

هي النفس ما حَمَّلْتَها تتحمل وللدهر أيام تجور وتَعْدِل أقلل عتابك فالبقاء قليل والدهر يعدل تارة ويميل

Monday, August 28, 2006

محدش عاجبه حاله

اسرتين فى نفس المكان و نفس الزمان لكن الحال غير الحال000
الاسره الاولى مكونه من الزوج و الزوجه و طفلين بجانبهما و الثالث لسه جاى فى الطريق فالام حامل فى الشهر الرابع
الاسره الثانيه مكونه من رجل فى الاربعينات من العمر و زوجته فى اواخر الثلاثينات
و المكان الذى جمع الاسرتين هو عياده دكتور امراض النساء حيث كانت تجلس الاسرتين بجانب بعضهما البعض
و دار الحوار التالى:0
الزوجه فى الاسره الاولى تقول لزوجها انا خلاص تعبت مش قادره مش عارفه الاقيها من العيال و شقاوتهم و لا من اللى فى بطنى و التعب اللى انا فيه بسببه صبح و ليل
يرد الزوج : معلش يا حبيبتى هانت كلها 5 شهور يعدوا هوا و ترتاحى من التعب ده
تقول الزوجه : ارتاح ؟؟ ارتاح ازاى ده انا هأبدا مرحله عدم النوم و عدم الاكل و الرضاعه و التغيير و الصراخ ...... اه يانى هاقضى طول عمرى كده و لا ايه نفسى اهتم بنفسى شويه و اقضى وقت لوحدى
و فى نفس الوقت يدور هذا الحوار فى الاسره الثانيه
الزوج : يا حبيبتى انتى عندى بالدنيا قلتلك كده مليون مره انا مانكرش انى كان نفسى زى اى راجل انه يكون عندى اطفال من صلبى لكن دى مشيئه ربنا هنعمل ايه ؟
الزوجه : نعمل اللى علينا ندق على كل باب فى احتمال حتى 1 فى الميه
الزوج : يا حبيبتى بقالنا 10 سنين فى الموال ده بين دكاتره و عمليات ومستشفيات و ادويه ده احنا لفينا العالم و صرفنا كل فلوسنا على الموضوع ده
الزوجه : يا حبيبى نفسى ابقى ام
الزوج : انتى فاكره الموضوع سهل كده انتى مش سامعه الناس اللى جنبنا بيشتكوا ازاى ده تعب و غلبه و حمل كبير قوى قوى
الزوجه : اه لو يعرفوا او يحسوا باللى جوانا انا متأكده انهم هايفضلوا يصلوا شكر لله لأخر عمرهم انا مستعده افضل طول عمرى احاول يمكن ربنا يكرمنا فى يوم من الايام
الزوج : على العموم الحمد لله يهب لمن يشاء اناثا و يهب لمن يشاء الذكور و يجعل من يشاء عقيما0
شوفتوا محدش عاجبه حاله حتى فى اجل و اجمل نعم الله اللى ذكرها فى القرأن الكريم على انها زينه الحياة الدنيا لكن لأن دى طبيعه بعض الناس مش عاجبهم النعم دى و حاسين انها نقم و العياذ بالله 0 سبـــحان اللـــه